Arestado ang anay miyembro sang Philippine Army sa pagbaligya sang shabu matapos ginkasahan ang drug buy bust operation sa Brgy. Calapawan, Panay Capiz.
Ang nadakpan amo si alyas “Joemarie”, 50-anyos, isa ka Street Level Individual ukon “SLI”, kag residente sang nasambit nga lugar.
Sa interview sang Bombo Radyo kay PCPT Jean V. Alayon, Officer in Charge sang Panay Municipal Police Station, iya ginpahayag nga madugay na nga nagagamit ini sang ginadumilian nga droga samtang nagaserbisyo bilang isa ka army apang gin-relieve ini sa pwesto bangud indi na niya matutukan ang iya obligasyon.
Suno pa kay Alayon, napreso na ini sang tuig 2016 sa banwa sang Mambusao kag sa sulod sang duha ka tuig ginapanilagan na ini siya.
Pahayag pa niya narekober ang apat ka sachet ang ginapatihan shabu nga nagabalor sang masobra P40,000, P3,000 nga buy bust money kag pila ka non-drug items.
Sa subong, nagapabilin na ini sa Panay MPS kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
