Pormal na nga gin-appoint ni President Ferdinand Marcos Jr. si anay Tourism Sec. Christina Garcia Frasco bilang Presidential Adviser for Sustainable and Resilient Communities matapos ang pila ka semana nga espekulasyon natuhoy sa iya nga pagbuya bilang sekretarya sang Department of Tourism.
Suno sa Malacañang, ginmandu-an sang Presidente si Frasco nga pangunahan ang pagpabaskog sang pagpatuman kag tayuyon nga implementasyon sang mga prayoridad nga national programs sa lebel sang komunidad, partikular sa mga lugar nga masami ginaigo sang kalamidad kag climate-related risks.
Kadungan sang iya nga bag-o nga obligasyon, si DOT Undersecretary Verna Buensuceso ang magaserbe nga officer-in-charge sang Department of Tourism agud masigurado ang tayuyon nga operasyon sang ahensya.
Ang appointment ni Frasco natabo sa tunga sang mga pagpakamalaut nga nabaton niya may kaangtanan sa ginaalegar “self-promotion” sa tourism materials sang gobyerno, butang nga hugot niya nga ginpanginwala.
Sa pihak sang kontrobersiya, nagapabilin nga mataas ang pagsalig sang Presidente sa iya nga ikasarang, rason agud nga i-appoint siya sa mas malapad nga papel nga naka-focus sa pagpabakod sang mga komunidad.
Ang amo nga tikang nakita bilang kabahin sang mas malapad nga inisyatibo sang administrasyon agud aksyunan ang epekto sang climate change kag extreme weather events sa pungsod, ilabi nak ag sang damlag lang ginreort sang Philippine Atmospheric, Geophysical and Astronomical Services Administration (PAGASA) ang mas masami nga maka-eksperyensya sang makusog nga bagyo kag heat waves sa rehiyon.
Sa bag-o nga posisyon, ginaluaman nga mangin sentro si Frasco sa pagpatuman sang mga programa nga pang-komunidad nga magadumala sang kabakod kag pagpabilin sang pangabuy-anan sang mga Pilipino.
