Padayon nga ginamonitor sang Police Regional Office-6 ang paghulag sang presyo sang gatong sa bug-os nga Western Visayas.
Sa interview sang Bombo Radyo kay, PMAJ. Lailyn Sencil, Spokesperson, sang Police Regional Office 6, iya ginpahayag nga ang pag pakig-angot sa Department of Energy, Department of Trade and Industry kag Local Government Unit (LGU), magahatg sang madali nga operasyon sqa pag-conduct sang monitoring.
Suno kay PMAJ. Sencil, ang Philippine National Police (PNP) nagarekord sang ginaalegar nga tuman kataas nga presyo sang gatong samtang nagahulat sang guidelines halin sa Department of Energy (DOE).
Dugang pa niya, ginahimo sang kapulisan ang regular nga pagmonitor sa mga gasoline station agud masiguro nga wala sang iligal nga pagpasaka sang presyo ukon hoarding sang suplay sang gatong.
Pahayag pa niya, sa subong wala pa sang na monitor nga specific nga gasoline station nga nagpasaka sang subra sang pagpasaka sang presyo sang gatong.
Nagpanawagan man ang natungdan, sa koperasyon sang tanan nga likawan ang panic buying kag hoarding sang gatong agud mapabilin ang bastante nga supply sa tunga sang nagapadayon nga tension sa Middle East.
