Gin-desisyonan sang International Criminal Court nga i-reject ang tanan nga rason nga ginhatag ni former President Rodrigo Duterte sa iya pagpangayo sang temporaryo nga kahilwayan.
Ginbasa ni Presiding Judge Luz Del Carmen Ibañez Carranza ang mga grounds sang kampo sang former president kag sa tatlo ka mga grounds, ini ang lunsay “rejected” unanimously.
Suno sa ICC, ginapaboran nila ang nauna nga desisyon sang korte sang Setyembre nga wala ginaaprubahan ang interim release sang anay presidente.
Ginpahayag pa sang ICC nga dapat magpabilin sa detention si Duterte agud nga masiguro nga makatambong ini sa trial kag malikawan ang mga posibilidad sang pag-pressure ukon pag-intimidate sa mga testigo.
NGAA NGA GIN-REJECT SANG ICC ANG APPEAL NI FORMER PRES. DUTERTE?
Pahayag sang ICC, wala napamatud-an ni Duterte nga may yara sang sala ang mga nauna nga judge sang gindesisyonan ini nga ipabilin nga detained.
Suno pa sa international tribunal, may yara sang kwarta si Duterte, may mga koneksyon sa luwas sang pungsod kag madamo sang kaalyado sa pulitika kag supporters sa Pilipinas.
Bangud sini, nagapati ang korte nga may yara sang abilidad ang former president nga magpalagyo ukon magpanago sa hustisya.
