Ginaduso na ang pagpatukod sang bag-o nga 100-bed, Level II Capiz General Hospital sa banwa sang Pontevedra matapos ginpaabot sang Department of Health (DOH) ang pauna nga ₱100 milyon nga pondo para sa proyekto.
Gindiskusyunan ini sa tunga sang Provincial Government of Capiz kag sang DOH, nga ginpangunahan ni Capiz Governor Fredenil H. Castro.
Kaupod sa paghinun-anon sanday Dr. Mar Wynn Bello sang DOH Western Visayas Center for Health Development (DOH WV CHD), Engr. Dubhe Lynn Guarnes sang DOH Region VI, Provincial Health Officer Dr. Alex T. Nolasco, kag Dr. Mary Joy D. Castroverde sang Capiz Provincial DOH Office.
Suno kay Dr. Bello, ginpain na sang DOH ang ₱100 milyon nga pauna nga pondo para masugoran ang pagpatukod sang ospital nga igatukod sa 1.2 ka ektarya nga duta sa Pontevedra. Ang Provincial Government sang Capiz ang magapanguna sa pagpatuman sang proyekto.
Ang duta nga pagatukuran sang bag-o nga ospital gindonar sa Provincial Government paagi sa inisyatibo ni Capiz 1st District Representative Ivan Howard Guintu, nga nagpanguna sa pagduso sang pagpatukod sang nasambit nga ospital.
Samtang, magapadayon ang proseso sang pagdonar sang duta suno sa nagakaigo nga legal nga pamaagi. Magasugod ini sa Letter of Intent (LOI) nga magapahayag sang tinutuyo nga paggamit sang lote, nga sundan sang Memorandum of Agreement (MOA) sa tunga sang mga natungdan nga partido agud mapat-od ang mga termino kag responsibilidad sang tagsa ka ahensya nga magabuligay sa proyekto.
Pagkatapos sini, pagasundan ini sang Deed of Donation bilang pormal nga proseso sang pagbalhin sang pagpanag-iya sang propiedad sa Provincial Government.
Ginalauman nga ang bag-o nga ospital makadugang sa kapasidad sang probinsya sa pagbaton kag pag-atipan sang mga pasyente, kag makapalapad sang access sa serbisyo medikal indi lamang para sa mga Capiznon kundi pati man sa mga pasyente halin sa naaminhan nga bahin sang Iloilo nga nagasalig kag nagapili nga magpa-ospital sa Capiz.
