Nakahanda ang Department of Social Welfare and Development (DSWD) nga magpadala sang mga mobile water treatment unit kag water tanker sa mga komunidad nga makaagom sang kakulangon sa limpyo nga tubig bangud sa Super El Niño kag iban pa nga mga kalamidad.
Suno kay DSWD Disaster Response Management Bureau Director Maria Isabel Lanada, ang mga mobile water treatment unit sang ahensya may kapasidad nga magproseso sang tubig nga nagahalin sa mga bubon, suba kag iban pa nga mga ginakuhaan sang tubig agud mangin magamit ini sang mga komunidad.
May yara man ang ahensya sang duha ka water tanker. Ang isa ginagamit sa pagproseso sang tubig, samtang ang isa naman ginagamit sa pagpanagtag sang tubig nga mainom.
Suno kay Lanada, ang nasambit nga mga kagamitan may kapasidad nga magproseso sang tubtob sa 2,500 ka litro sang tubig kada oras.
Samtang, may yara man sang 21,000 ka family water filtration kit nga nakahanda ang DSWD nga ipanagtag sa mga local government nga nagakinahanglan sang limpyo kag hilway nga mainom nga tubig.
Suno sa ahensya, prayoridad sini nga buligan ang mga local government nga nagdeklara sang state of calamity bangud sa mga epekto sang Super El Niño.
Apang, kinahanglan anay nga makig-angut kag magpasaka sang pangabay ang mga local government unit sa DSWD antes mapadala ang mga kagamitan sa ila mga lugar.
Ginpaandaman man sang DSWD nga mahimo gamiton ang filtration kit sa tubig nga nagahalin sa mga sapa, tubig-ulan, deep well ukon madalom nga bubon, kag tubig nga ginadala sang mga fire truck sa tion sang emerhensya. Apang, kinahanglan siguruhon nga husto ang paggamit sang kit kag masunod ang mga instruction agud mangin safe ang tubig nga imnon.
Dugang diri, nagahanda man ang DSWD sang iban pa nga mga tikang agud masiguro ang supply sang tubig kag iban nga nagapanguna nga kinahanglanon sang mga pamilya nga maapektuhan sang tuman nga tig-ilinit kag Kakulangon sang tubig.
Mahimo man makakuha sang tubig ang mga komunidad sa mga water reservoir nga gintukod sa idalom sang Project Local Adaptation to Water Access ukon LAWA, basta may yara pa sang bastante nga supply kag nasiguro nga hilway ini gamiton.
Paagi sa sini nga mga tikang, ginatinguhaan sang DSWD nga mabuligan ang mga komunidad nga makaangkon sang tubig, ilabi na sa tion sang tuman nga Kakulangon sang tubig kag iban pa nga mga kalamidad nga mahimo magapabudlay sa pagkuha sang limpyo nga tubig nga mainom.
