LOKAL – NAGPANAGTAG SANG INFORMATION LEAFLETS ANG MGA PERSONNEL SANG ROXAS CITY POLICE STATION (RCPS) PARA SA HUSTO NGA PAGGAMIT SANG UNIFIED 911 NATIONAL HOTLINE NGA MAHIMO GAMITON SANG MGA PUMULUYO SANG ROXAS CITY.
Sa interview sang Bombo Radyo kay PLTCOL Rogelio L. Tomagtang Jr., Chief of Police sang Roxas City Police Station, gin-engganyo niya ang mga pumoluyo nga gamiton ang Unified 911 kon nagakinahanglan sang bulig sang kapulisan ukon emergency assistance agud mas madasig ang pagresponde sang lokal nga gobyerno kag sang police station.
Ginpaathag man ni Tomagtang nga kinahanglan mangin responsable ang mga pumoluyo sa paggamit sang Unified 911 kag gamiton lamang ini para sa mga matuod nga emerhensya kag kinahanglanon nga bulig.
Suno pa kay Tomagtang, sa subong wala man sang naireport nga prank calls sa Roxas City may kaangtanan sa paggamit sang Unified 911. Kada adlaw, masobra sa 15 ka tawag ang nabaton sa syudad paagi sa nasambit nga national hotline.
Dugang pa niya, madasig nga makaresponde ang mga kapulisan bangod may mga personnel nga ginatalaga sa mga estratehikong lugar sa Roxas City agud mas malapit sila sa mga pumoluyo kag mas madasig makahatag sang bulig sa mga nagakinahanglan sini.
