Isa ka bala sa mga indibidwal nga masami nga kulang ang tulog?
Nakahibalo ka ayhan nga ang Pilipinas ang may pinakamadamo nga tawo nga kulang ang tulog sa bilog nga Asya?
Sandig sa pagtuon sang consumer research kag data analytics company nga Milieu Insight sang 2023, ang Pilipinas ang may pinakamadamo nga tawo sa Asya ukon 56% nga may manubo sa pito ka oras ang ginatulog sa tagsa ka adlaw.
Ginasundan naman ini sang Thailand nga may 49%, Indonesia nga may 44%, Vietnam nga nag-angkon sang 43%, Singapore nga may record nga 42% kag Myanmar nga may 39%.
Sa nasambit nga pagtuon, nahibaluan man nga ang mga Pinoy ang ika-apat sa bilog nga kalibutan nga may pinakamalip-ot nga tulog.
Sa sleep tracking application nga Sleep Cycle, makit-an sa survey nga ang Filipino adults ang may yara sang average nga anum ka oras kag 30 minutos nga tulog sa tagsa ka adlaw.
Apang, ginarekomendar sang Harvard Medical School ang indi magnubo sa pito ka oras nga “quality” sleep sa tagsa ka indibidwal sa ano man nga edad, para sa body restoration kag malikawan ang mas mataas nga risgo sang mga balatian kasubong sang diabetes, stroke, heart disease, kag mental health problems.
