Nagpaandam ang Department of Social Welfare and Development (DSWD) nga posible nga maglab-ot sa mga 1.4 milyon ka pamilya nga mga Pilipino ang maapektuhan kag posible mangin pigado kun indi insigida maghulag ang gobyerno sa pagresponde sa epekto sang nagapadayon nga oil crisis sa tensyon sa Middle East.
Sa hearing sang Senate Committee on Proactive Response and Oversight for Timely and Effective Crisis Strategy (PROTECT), ginpahayag ni Social Welfare Secretary Rex Gatchalian nga base sa mga simulation sang Philippine Institute for Development Studies kag Asian Development Bank (PIDS), posible nga magdamo ang mga pobre sa sulod sang una nga tatlo ka bulan sang krisis tubtob Hulyo kun wala sang nagakaigo nga aksyon ang gobyerno.
Ginpahayag pa niya nga mas mataas pa ang ila internal estimates kumpara sa una nga ginbana-bana nga numero.
Samtang, ginabulobanta nga masobra 400,000 ka kabalayan ang posible masakop sa “near-poor” category, suno kay Senate PROTECT Committee Chairman Sherwin Gatchalian.
Ginsiling man sang DSWD nga target nila nga mabuligan ang 7.5 milyon ka kabalayan, kaupod diri ang mga benepisyaryo sang Pantawid Pamilyang Pilipino Program (4Ps), mga kubos nga household base sa Community-Based Monitoring System (CBMS), kag mga low-income kag minimum wage earners nga narehistro sa Social Security System (SSS).
Dugang pa nga nagakinahanglan sang P74 billion agud masuportahan ang ginatawag nga bottom 30% sang populasyon kag mabalik ang ila nabuhin nga kapasidad sa paggasto.
Aminado man ang DSWD sa “aid fatigue,” apang ginpabutyag nga importante gihapon ang suporta sang gobyerno agud malikawan ang mas mas madalom nga pagnubo sang ekonomiya sa palaabuton.
