ROXAS CITY – Nagapabilin sa alert level 3 ang Barangay Agbatuan, Dumarao, Capiz kasunod sang pag-evacuate sang 34 ka pamilya ukon 200 ka mga indibidwal bangud sa pamahog sang landslide.
Sa interview sang Bombo Radyo Roxas kay Mr. Sandy Gonzaga, head sang operations and warning unit sang Municipal Disaster Risk Reduction and Management Office, ginpahayag sini nga indi pa mahimo nga makabalik sa ila mga balay ang nasambit nga pamilya bangud sa peligro sa ila nga kabuhi.
Suno pa kay Gonzaga nga napulo ka mga balay nga yara sa tiilan sang bukid ang direkta nga matabunan sang duta kun makaangkon sang landslide, matapos nakita sa ginpahamtang nga device sang Phivolcs ang paghulag sang duta nga gintunaan sang madamo nga litik sa duta.
Bangud diri, ginpanugyanan sang MDRRMO ang mga residente nga indi anay magbalik sa ila mga balay tobtob wala sila ginapahanugutan sang gobyerno.
Ginmandu man ni Mayor Edgardo Arancillo sa Municipal Social Welfare and Development Office ang paghatag sang gilayon nga bulig sa mga pamilya nga nag-evacuate sa ila mga balay, kasubong sang bugas kag lata sang sardinas subongman ang paghatag sang tanan nga kinahanglanon sang apektado nga mga residente.
