Sa Thailand – Nakasapo ang mga otoridad sang isa ka unexploded firebomb sa isa ka dako nga mall sa Bangkok, Thailand.
Sa interview sang Bombo Radyo Roxas kay Bombo International Correspondent Cleo Rose Jondonero, ginpahayag nito nga suno sa mga otoridad, functional ukon mahimo nga magsigabong ang nasambit nga bomba apang natabunan sang madamol nga tela gani wala sang nagakaigo nga oxygen agud magkalayo ini.
Nahibaluan nga timer-triggered ang nasambit nga device kag nakakabit sa isa ka power bank.
Nagapati ang mga pulis nga kadungan ini sang mga bomba nga nagsigabong sang nagligad nga Biyernes samtang ginapatigayon ang Southeast Asian Foreign Ministers Meeting sa Bangkok nga gintambungan sang mga opisyal sang Amerika, China kag iban pa nga mga dalagkuan nga nasyon.
Suno kay Deputy Prime Minister Prawit Wongsuwan nga ang nasambit nga pag-atake sang nagligad nga Biyernes kahimuan sang mga rebelde sa Southern Thailand.
Wala naman gindetalye sang opisyal ang iban pa nga impormasyon angut sa nasambit nga grupo bangud nagadapadayon sa gihapon ang ila nga imbestigasyon.
