ROXAS CITY – Balik karsel ang 40-anyos nga lalaki matapos nga nadakpan sa ginkasa nga drug buy bust operation sang mga katapo sang Station Drug Enforcement Team (SDET) sang Roxas City PNP, sa Pueblo de Panay, Brgy. Lawaan, Roxas City.
Ginkilala ang subject person kay Policarpio Diaz alyas ‘Kapo’, may asawa kag kabataan nga residente sang Angelville subdivision, Barangay San Jose, sini nga syudad.
Nakuha sa paghinakop ni Diaz ang 6 tanan ka sachets sang ginasuspetsahan shabu, ginabulubanta nagabug-at sang 1.2 grams kag nagabalor sang P8,160, P500 nga drug buybust money kag 1 ka unit sang cellphone.
Sa interview sang Bombo Radyo kay Police Senior Master Sergeant (PSMS) Ramil Arcangeles, tagpamaba sang Roxas City PNP, ginpahayag sini nga ba-se sa ila monitoring, liwat nga nagbalik sa iligal nga aktibidad ang isa pa lamang ka bulan nga nakaguwa sa presohan nga suspek.
Nadakpan si Diaz sang 2016, sang mga katapo sang President Roxas MPS bangud sa paggamit sang iligal nga droga, kag nahilway subong nga tuig pinaagi sa plea bargaining agreement.
Ginpahayag nga gin-aku ni Diaz nga sa gihapon, nagagamit kag nagaduso ini sang iligal nga droga kag ginbuyagyag nga may katransakyon sa mga barangay sang Punta Tabuc kag Libas.
Mensahe sang kapulisan sa mga ginhatagan sang tyansa sang gobyerno nga mahilway pinaagi sa plea bargaining agreement, nga mangin hantup sa ila pagbag-o bangud padayon ang mga ini nga ginamonitor sang mga otoridad.
Pagadal-on si Diaz sa Iloilo Crime labroratory para sa drug examination kag kun magpositibo sa droga, pagapasakaan ini sang kaso nga paglapas sa RA 9165 ukon ‘Comprehensive Dangerous Drugs Act of 2002.’
