ROXAS CITY – Ginpanindugan ni City Councilor Albert Gregory Potato nga nagasunod lamang sila sa guidelines sang national Inter-Agency Task Force (IATF) natuhoy sa pagsulundan sa mga general community quarantine (GCQ) kag modified general community quarantine (MGCQ) areas.
Suno sa konsehal nga mas magapangibabaw ang pagsulundan sang nasyunal pag-abot sa mga limitasyon sang hulag sang mga tawo bangud sang ginapangatubang sa karon nga pandemiya.
Ginpahayag ni Potato nga ila man ginahinalaan sa konseho sang siyudad kun ibalik na sa normal ang biyahe sang mga tricycle nga sa karon ginlimitahan sa isa lamang ka pasahero.
Suno diri nga bisan pa luyag nila nga paboran ang ginahinyo karon sang mga tricycle drivers nga pasugtan sila nga magkarga sang masobra sa isa ka pasahero, wala sila sang mahimo bangud kinahanglan man nila nga magsunod sa rekomendasyon sang national IATF bangud indi nila ini mahimo nga malapas.
Apang mahimo suno diri nga mag-apelar ang gobyerno-probinsiyal sang Capiz sa national IATF para makonsiderar ang ginawangal karon sang mga tricycle drivers.
Apang aminado ang konsehal nga mabudlay gidman masunod ang physical distancing sa disenyo sang tricycle rason nga temporaryo nga ginlimitahan sa isa ka pasahero ang mahimo makasakay.
Ginpasalig man sang konsehal nga sa ila pagtalakay kag paghimo sang desisyon, ila ikonsiderar ang kaayuhan sang kadamuan.
