ROXAS CITY – Patay ang isa ka lalaki samtang pilason naman ang kaupod sini sang aksidente nga bumunggo ang ginasakyan sini nga motorsiklo sa isa ka dump truck sa Barangay Bunga banwa sang Mambusao.
Ginkilala ang driver sang motorsiklo nga si Philip Llanera Lariosa, 22- anyos kag residente sang Brgy. Poblacion Tabuc sa nasambit nga banwa samtang ang backrider sini nga tiyo ang ginkilala kay Felipe Cerilo Llanera.
Sandig sa imbestigasyon sang kapulisan, ginasubay sang motorsiklo ang karsada nagikan sa Jamindan padulong sa banwa sang Mambusao apang sang yara na sa bahin sang highway sa Sitio Quary barangay Bunga, Mambusao, hinali nalang sini nga nabungguan ang ido nga nagakatabok rason nga nadulaan sang kontrol ang driver kag nakadto ang motorsiklo sa pihak nga linya kun sa diin nabungguan ang nagapadulong nga 10 wheeler dump truck.
Ang nasambit nga dump truck ang ginamaneho ni John Rey Trinidad Punzalan, 28- anyos kag residente sang Barangay Poblacion, banwa sang Sapian kag kaupod sini ang helper nga si Ricardo Sanchez Loyola, 30- anyos kag residente sang Barangay Sta. Cruz banwa sang Ivisan.
Bangud sa aksidente, nag-angkon sang pilas sa magkatuhay nga parte sang lawas ang driver sang motorsiklo kag backrider sini kag gilayon nga ginpadangat sang nagresponde sa Mambusao District Hospital apang gindekalarar nga dead on arrival (DOA) ang backrider.
Sa karon, padayon pa ang imbestigasyon sang kapulisan.
