ROXAS CITY – Dead on arrival ang 18-anyos nga lalaki samtang pilason ang backrider sini matapos nga aksidente nga natumba ang ginamaneho nga motorsiklo sa Sitio Crossing 41, Brgy.Agambulong banwa sang Jamindan.
Ginkilala ang driver kay Joselito Cusay, residente sang Sitio Masnang sang amo nga barangay.
Samtang, ginkilala ang backrider kay James Ryan Agustino, 22-anyos, residente sang Sitio Nag-Uring sang amo man nga barangay.
Sandig sa imbestigasyon sang Jamindan MPS, samtang ginasubay sang duwa ang dalan papuli kuntani sa ila puluy-an, pag-abot sa kurbadahon aksidente ini nga nadulaan ini sang kontrol kag natumba rason nga nagtupa ini sa stock pile nga yara sa higad sang karsada.
Gilayon naman ginpadangat sa ospital ang duwa apang ang driver sang motorsiklo ang gindeklarar nga dead on arrival sang doktor.
Sa karon, ginkustodiya sang Jamindan MPS ang nadalahig nga motorsiklo para sa nagakaigo nga disposisyon.
