ROXAS CITY – Patay ang 21-anyos nga lalaki matapos aksidente nga nabungguan ang ginamaneho nga motorsiklo sang isa ka SUV sa Barangay Lawaan, sining syudad.
Ginkilala ang biktima nga si Randolf Descalzota sang Barangay San Antonio, Cuartero, Capiz nga nag-angkon sang patal nga pilas sa ulo kag lawas samtang nabali ang backrider sini nga si Raphie Gallardo, 20-anyos sang Barangay Pang-Pang Sur, Mambusao, Capiz.
Nagaguwa sa imbestigasyon sang pulisya nga padulong sa Roxas City ang mga biktima apang pag-abot sa Barangay Lawaan, aksidente nga nabungguan sang nagasunod nga SUV nga ginamaneho ni Charles Arthur Daria sang Barangay Tambo, Paranaque City.
Gindala pa sa ospital si Descalzota apang gindeklara nga dead on arrival.
Sa karon yara sa kostodiya sang pulisya ang driver sang SUV para sa dugang nga imbestigasyon.
