PILAR CAPIZ – Patay ang isa sa mga back rider samtang duha naman ang pilason kalakip na ang driver matapos aksidente nga bumunggo sa street light ang ginasakyan sang mga ini nga motorsiklo sa Barangay Santa Fe, Pilar Capiz.
Ginkilala ang driver sang motorsiklo nga si alyas “Rolando”, 46-anyos samtang mga backrider sini nga sanday alyas “Raul”, 59-anyos kag alyas “Herbert”, 36-anyos lunsay mga residente sang Barangay San Eeteban sa amu nga banwa.
Sa interview sang Bombo Radyo sa imbestigador sang Pilar Municipal Police Station nga si PSSG. Jaypee Tomogda, ginpahayag sini nga sang natabo ang insidente takna alas 10:50 sang aga samtang ginasubay sang mga ini ang dalan sakay ang Honda TMX 125 nga motorsiklo nagikan sa ila lugar kag padulong kun tani sa puluy-an sang ila amo sa Barangay Santa Fe aksidente nga nadulaan sang kontrol sa pagmaneho ang driver.
Bangud sa makusog nga impact, nagtabog si alyas “Raul” kag nagbunggo ang ulo sini sa street light kabangdanan nga nag-angkon sang patal nga pilas.
Samtang minor naman nga pilas ang naangkon sang driver kag isa pa ka sakay sini nga si alyas “Herbert”.
Gilayon naman nga ginrespondihan kag ginpadangat sa pinakamalapit nga ospital ang mga nagkalapilsan apang gindeklarar nga dead on arrival sang doctor si alyas “Raul”.
Suno kay Tomogda, base sa mga nakasaksi sa aksidente madasig ang pagpadalagan sang driver sang amu nga motorsiklo.
Mahibaluan nga yara sa idalum sang impluwensya sang makahulubog nga ilimnon ang nasambit nga mga persona sang natabo ang insidente.
