1 patay, 2 pilason matapos ang nagluntad nga karambola sang 4 ka behikulo sa brgy tanza

ROXAS CITY – Patay ang isa ka driver sang motorsiklo samtang duha ang pilason matapos nga nagkarambola ang 2 ka motorsiklo, isa ka elf truck kag topdown nga motorsiklo sa Barangay Tanza Gua, Roxas City, kahapon nga adlaw, Agosto 8.

Ginkilala ang namatay kay Hans Edcel Bunio Arca, 29-anyos residente sang Brgy. Sublangon Pontevedra Capiz driver sang Honda RS 125.

Samtang ang napilasan ang ginkilala ang driver sang Kawasaki CT 100 nga si Alimar Azarce, 38-anyos, residente sang nasambit nga lugar kag driver sang topdown nga si Danilo Almia, 65-anyos residente sang Brgy. Cagay sini nga syudad.

Sandig sa imbestigasyon ni PCpl. Ben Angelo Celino, samtang ginasubay sang duha ka motorsiklo ang dalanon sa pareho nga direksyon gikan sa syudad, sang aksidente nga nagbungguanay ang duha rason sang ila pagkatumba sa tunga sang karsada.

Samtang, ginasubay naman ni Almia ang pareho nga direksyon kaangay sang duha ka motorsiklo kag ginapahayag nga nagpang-agaw ini sang linya rason nga gintinguhaan nga malikawan ini sang kasugata nga elf truck nga ginamaneho ni Hilario Besana, 61-anyos, residente sang nasambit nga lugar apang nadulaan ini sang kontrol sang manubela kag nasangit sini ang nalikod nga bahin sang topdown kag bumunggo sa duha ka motorsiklo.

Nag-angkon sang pilas sa magkatuhay nga parte sang lawas ang tatlo ka mga persona nga madasig naman gindapatan sang pauna nga pagbulong sang RCERT kag CERT.

Kritikal nga ginpadangat si Arca sa isa ka pridabo nga ospital kag ginbawian ini sang kabuhi samtang ginabulong.

Nagapabilin naman sa ospital si Azarce kag Almia para sa dugang nga pagbulong.

Sa karon, yara na sa kustodiya sang kapulisan si Besana kag mga nadalahig nga behikulo samtang nagapadayon ang imbestigasyon angut sa insidente.