ROXAS CITY – Dead on arrival nga ginpadangat sa ospital ang isa ka driver, samtang duha ang pilason matapos ang nagluntad nga pagbungguanay sang duha ka mga motorsiklo, sa national highway sang Barangay Cagay, Roxas City, alas-11:55 kagab-i, Enero 21.
Ginkilala ang napatay nga driver sang Honda Click kay Neelvine Albaladejo, 28-anyos, soltero, mekaniko kag residente sang Brgy. Lawaan, Roxas City.
Samtang ang backrider sini amu si Angela Borreros, 19-anyos kag residente sang Brgy. Bolo, sini man nga syudad.
Sandig sa inisyal nga imbestigasyon ni PCpl. Ben Angelo Celino, traffic investigator sang Roxas City PNP, nga samtang ginasubay sang driver sang Yamaha R3 nga motorsiklo nga ginkilala kay Paul Ivan Benemili, 29-anyos, nga residente sang Malipayon Village, Brgy. Tiza, Roxas City, ang amu nga dalan nagikan sa syudad sang Roxas padulong sa direksyon sang Brgy. Cagay, apang pag-abot sa lugar ginpahayag nga nabungguan ini sang kasugata nga Honda Click nga motorsiklo.
Bangud sini, head on collision ang natabo nga pagbungguanay kun sa diin nag-angkon sang pilas sa ulo kag nagkalain-lain nga parte sang lawas ang nasambit nga mga persona.
Madasig nga ginpadangat sa pribado nga ospital si Albaladejo apang gindeklarar ini nga patay, samtang unconscious naman sanday Borreros kag Benemili nga gindala sa magkatuhay nga ospital sa syudad.
Sa dugang nga imbestigasyon sang kapulisan, ginapahayag nga ginlikawan sang driver sang Honda Click ang may tubig nga lubak-lubak nga dalan, rason nga naagaw sini ang linya sang kasugata nga motorsiklo.
Nagapadayon ang imbestigasyon sang mga kapulisan angut sa aksdente.
