ROXAS CITY – Patay ang isa ka persona samtang pilason naman ang apat ka iban pa sa karambola sang tatlo ka mga salakyan sa Barangay Cudian, Ivisan, Capiz.
Ginkilala ang napatay nga biktima kay Romeo Bayaban, 63 anyos, driver sang Montero Sports nga puti kag napilasan naman ang asawa sini nga si Susana Bayaban.
Pilason man ang driver sang Mitsubishi Strada nga nabungguan sang salakyan ni Romeo nga ginkilala kay Erwin Mateo, 50 anyos.
Nakaangkon man sang menor nga kasamaran sa lawas sanday Violeta Laurilla kag anak sini nga si Vinneth Laurilla, driver sang isa pa ka Montero Sports nga silver nga nabungguan man sang salakyan ni Romeo.
Ba-se sa inisyal nga imbestigasyon, nagpang-agaw sang linya ang salakyan nga ginamaneho ni Romeo rason nga aksidente sini nga nabungguan ang salakyan nga ginamaneho ni Mateo.
Kasunod sini, nabungguan pa sang salakyan ni Romeo ang ang salakyan nga ginamaneho ni Laurilla.
Didto kag nadulaan na sang kontrol sa iya nga manubela si Romeo kag nagbaliskad sa dalan ang salakyan sini.
Nag-angkon sang patal nga pilas sa ulo si Romeo nga gintunaan sang iya nga kamatayon samtang nagkalapilasan man sanday Susana, Mateo kag mag-iloy nga Laurilla nga gilayon ginpangdala sa ospital agud madapatan sang nagakaigo nga pagbulong.
