ROXAS CITY – Ginbawian sang kabuhi samtang ginabulong sa ospital ang isa ka tricycle driver matapos nga nagbaliskad ang ginamaneho sini nga tricycle sa Arnaldo Blvd., Barangay Baybay, Roxas City.
Ginkilala ang biktima nga si Carlito Capay, residente sang Barangay Mianay, Ivisan, Capiz.
Mahibaluan nga padulong kuntani sa Barangay Baybay ang biktima sakay sa iya tricycle kaupod ang apat ka iban pa nga pasahero sang aksidente sini nga nasanggit ang naka-park nga tricycle sa kilid sang karsada.
Bangud diri, nadulaan sang kontrol sa manubela ang biktima rason nga nagbaliskad ang ginamaneho sini nga tricycle.
Nag-angkon sang patal nga pilas sa ulo kag iban pa nga parte sang lawas ang biktima nga gintunaan sang iya nga kamatayon.
Pilason man ang apat ka mga pasahero nga sakay sang biktima nga sanday Bambee Curatcho, Hannah Mae Curatcho, Amor Curatcho kag Weeklyn Curatcho kun sa diin ang iban sa mga ini ang nabalian.
Gilayon naman nga gindapatan sang nagakaigo nga pagbulong ang iban pa nga napilasan nga pasahero.
