ROXAS CITY — Padayon pa nga ginabulong sa ospital ang apat ka mga mangunguma nga ginpangluthang sa Barangay Culilang, President Roxas, Capiz kahapon.
Ang insidente nagresulta man sa kamatayon sang ila kaupod nga si Orlando Eslana nga gindeklarar dead on arrival sa ospital.
Ang mga samaron ang ginkilala kanday Melinda Eslana nga utod sang napatay kag may igo sang bala sa ulo nga gintransfer sa siyudad sang Iloilo, mag-utod nga sanday Abel Vergara nga may samad sa magtimbang nga kamot kag Ana Bocala nga may samad sa tuhod kag Nida Amo nga may samad sa magtimbang nga tiil.
Ang tatlo ang lunsay naka-confine subong sa Roxas Memorial Provincial Hospital.
Suno sa isa sa mga mangunguma nga nakasaksi sang insidente nga si Rolando Amistoso, nagsulong sa ila kadutaan ang grupo ni barangay kagawad Leopoldo Lachica sakay sa traktora kag ginsalakay ang ila ginpahamtang nga mga kural pati ang ila mga kaupdanan nga nagbangga sa traktora nga indi makasulod.
Si Lachica ang tiyo sang kapitan sang barangay nga si Ferdinand Bacanto.
Apang suno, kay Amistoso hinali na lamang sila nga ginpangluthang sang grupo ni Lachica rasun nga sila ang naghalapa.
Gin-alegar pa ni Amistoso nga sa pihak nga nagahapa na ang mga mangunguma, ginpaulanan sa gihapon sila sang bala sang mga suspetsado.
Gintudlo ni Amistoso si Lachica, ang utod sang kapitan nga si Jun Bacanto, Jun Vega, Aldrin Vega, Christopher Bacanto kag iban pa nga wala makilala nga mga lalaki nga amo ang nagpangluthang sa ila.
Mahibaluan nga may madugay na nga konflikto ang mga mangunguma kag kampo ni Bacanto nga amo ang gintulinan sang pamilya Tan nga mag-administrar sa ila nabilin nga kadutaan.
Ini bangud padayun sa gihapon nga gina-okuparan sang mga tinawo sang kapitan ang porsiyon sang kadutaan nga ginapanag-iyahan sang mga mangunguma.
Una na nga ginpanindugan sang mga mangunguma nga ila ang amo nga kadutaan bangud ginhatag na ini sa ila sang gobyerno pinaagi sa Comprehensive Agrarian Reform Program.
Base naman sa spot report sang President Roxas PNP, ginlabo pa sang napatay nga si Eslana si barangay kagawad Lachica antes ini ang natiruhan.
Suno diri nga ginsaka ni Eslana ang traktora nga ginamaneho ni Lachica kag ginlabo ang kagawad, apang ginsagang ini sang anak sang kagawad nga si Jesery Lachica nga kaupod man niya nga nagasakay sa traktora.
Bangud sini, nasamaran ang bata nga Lachica sa natuo nga kamot kag ulo.
