Patay ang isa ka lalaki samtang kritikal naman ang kaupod sini matapos mabungguan sang pribado nga salakyan ang ila ginamaneho nga motorsiklo sa Barangay Manibad, Mambusao, Capiz.
Ginkilala ang napatay nga si Ronald Valdez, 37-anyos kag residente sang Barangay Caidquid sa amo man nga banwa samtang kritikal si Felicio Durana sang Barangay Sto. Rosario sa banwa sang Jamindan.
Base sa imbestigasyon sang traffic section sang Mambusao PNP nga nagpang-agaw sang linya ang suspek nga si Serafin Legue, 75-anyos ang edad kag residente sang Barangay Lapaz sa banwa sang Jamindan rason nga bungguan sini ang motorsiklo sang mga biktima.
Nag-angkon sang patal nga pilas ang napatay nga biktima kag seryoso nga kasamaran naman ang naagom sang kritikal nga biktima.
Mahibaluan nga nagpabutiyag pa ang suspek nga napiyungan ini rason nga wala matalupangdan nga nagpang-agaw na ini sang linya.
Sa karon yara na sa kustodiya Mambusao PNP ang suspek kalakip na ang iya salakyan.
