ROXAS CITY – Ginbawian sang kabuhi ang isa ka persona matapos nga ginaalegar naigo sang aksidente nga nagpalupok sang armas-luthang ang katapo sang Philippine Army, sa Barangay Aglibacao, Jamindan, Capiz.
Ginkilala ang biktima kay Arnulfo Vacaro, 40-anyos, kag residente sang Brgy. Pangabat, sa amu nga banwa.
Samtang ang ginatudlo suspek amu si Sgt. Joemariel Vacaro, 35-anyos, miyembro sang Phil. Army nga nadestino sa 12IB sa Calinog, Iloilo, kag residente sang Brgy. Aglibacao, sa amu man nga banwa.
Sandig sa inisyal nga imbestigasyon ni PSSgt. Lou Jacinto Robles, imbestigador sang Jamindan MPS, nga mga alas-4:50 sang hapon, kahapon sang Martes, naga-inom-inom sa balay sang suspek ang biktima kaupod si Jesreel Vacaro, 45-anyos, kag residente sang nasambit nga barangay, kag ang nasambit nga suspek nga lunsay magpalarentihanay.
Ginpahayag nga samtang naga-inom-inom, ginhampangan ni Sgt. Vacaro, ang iya 357 caliber nga armas-luthang.
Dugang pa sini nga nagtindog si Jesreel Vacaro kag nagpangihi 5 ka metros ang kalayuon sa ila ginapuwestuhan, apang hinali nga nakabati ini sang lupok, kag gilayon nga nagbalik sa iya mga kaupdanan agud tsekyaron.
Nasapwan nalang sini nga ginahakos na sang suspek ang duguon nga biktima.
Madasig nga ginmaneho ni Jesreel ang motorsiklo, samtang ginsakwat sang suldado ang biktima kag ginpadangat sa Jamindan RHU, gintransfer sa isa ka pribado nga ospital sa syudad, apang ginbawian ini sang kabuhi samtang ginabulong.
Boluntaryo nga nagsungka ang suspek nga suldado sa katapo snag kapulisan bitbit ang armas-luthang.
Narekober nga ebidensiya ang 1 ka baseyo sang ginapatihan iya sang Smith and Weason 357 Revolver magnum.
Sa karon, padayon ang imbestigasyon sa aksidente matapos nagaguwa sa inisyal nga imbestigasyon nga wala sang motibo ang suspek nga luthangon ang biktima.
