ROXAS CITY– Nag-engkwentruhanay ang tropa sang militar kag New People’s Army (NPA) sa Sitio Tigpaka Gamay, Barangay San Antonio, Cuartero, Capiz.
Sa interview sang Bombo Radyo kay Lt. Col. Sisenando Magbalot Jr., ginpahayag sini nga nakabaton ang militar sang impormasyon nga may yara sang presensiya sang armado nga kalalakihan sa nasambit nga lugar.
Suno sa iya nga gilayon nagresponde ang tropa sang gobyerno kag ila naka-engkwentro ang masobra 15 ka mga miyembro sang NPA.
Mahibaluan nga nagdugay sang isa ka oras ang pagbayluhanay sang lupok antes nag-atras ang mga rebelde.
Ginkumpirmar man ni Magbalot nga may narekober ang militar nga isa ka bangkay sang ginapatihan rebelde kag isa ka AK 47 Riffle sa ginluntaran sang engkwentro.
Wala naman sang may napilasan ukon napatay sa mga soldado kag padayon nga ginahibalo kun pila ang nasamaran sa kampo sang mga rebelde bangud sa nakita nga mga tinulo sang dugo.
