ROXAS CITY – Patay ang driver sang ambulansya sang Sigma- Municipal Disaster Risk Reduction and Management Office matapos nga ginbungguan sang Montero nga salakyan nga ginamaneho sang hepe sang Dumalag PNP sa Barangay Ondoy, Ivisan, Capiz.
Base sa inisyal nga imbestigasyon nga magapadulong kuntani sa siyudad sang Roxas para magsugat sa mga Returning Overseas Filipino’s ang ambulansya nga ginamaneho ni Darius Yap kun sa diin sakay sini ang mga frontliners nga sanday John Rey Castillon, 29-anyos sang Barangay Poblacion Norte kag Ernie Fulgencio 25-anyos, sang Barangay Manggoso sang amo man nga banwa.
Apang, aksidente na lamang ini nga ginbungguan sang Montero Sport nga salakyan nga ginamaneho ni Police Captain Alcer Daba-ay Monsera sang Dumalag PNP, 49-anyos kag residente sang Saint Jude Subdivision Manduriao, Iloilo City kaupod ang mga pasahero sini nga sanday Oliver Clarito Aguihap, 21-anyos sang Barangay Culajao, Roxas City kag Romelyn Gondao Baldado, 19-anyos sang Barangay Kabankalan City, Negros Occidental.
Bangud sa mabaskog nga impact sang pagkabunggo, nag-angkon sang patal nga pilas sa lawas ang driver sang ambulansya nga si Yap nga gilayon gindala sa Capiz Doctor Hospital apang gindeklarar na ini nga dead on arrival sang attending physician.
Samtang, ang driver naman nga si Police Captain Monsera ang nag-angkon man sang pilas sa lawas nga gilayon naman gindala sa Capiz Emmanuel Hospital.
Magluwas diri, gilayon man ginpangdala sa ospital ang mga pasahero sang duha ka nasambit nga salakyan para sa nagakaigo nga pagbulong.
Sa karon, nagapadayon pa ang imbestigasyon sang mga kapulisan sa nagluntad nga aksidente.
