ROXAS CITY – Nag-angkon sang pilas sa lawas ang driver sang motorsiklo matapos nga ginaalegar na-side swipe sang salakyan nga Toyota Fortuner sa Barangay Dinginan, Roxas City.
Ginkilala ang napilasan nga biktima nga si Jonathan Amarillo 53-anyos samtang maswerte naman nga wala nag-angkon sang pilas ang backrider sini nga si Rommel Eribal 44-anyo nga lunsay mga residente sang Barangay Cagay sining siyudad.
Base sa inisyal nga imbestigasyon sang Roxas City Police Station nga samtang ginasubay sang mga biktima ang dalanon sakay sa ila motorsiklo sang hinali na lamang nga nag-overtake ang salakyan nga ginamaneho ni Fernan John Muyco 24-anyos sang Barangay Bolo, sining siyudad.
Bangud diri, natumba ang motorsiklo rason nga nag-angkon naman sang pilas sa lawas ang driver nga si Amarillo.
Gilayon naman gindapatan sang nagakaigo nga pagbulong ang naangkon nga pilas sini.
Samtang, nagkasugot na lamang ang magtimbang nga bahin sa pagpakaayo sa mga damages nga natuga sang nagluntad nga aksidente.
