ROXAS CITY – Padayon nga ginaayam sang mga kapulisan ang isa sa duha ka mga suspek nga nagbuno sa duha ka mga persona matapos nga ginaalegar ginbuno sa isa ka bilasyunan sa Barangay Bailan, Pontevedra, Capiz.
Ginkilala ang mga biktima nga sanday Rey Estorque 36-anyos sang Barangay Sinabsaban, Cuartero, Capiz kag 14-anyos nga wala na ginhingadlan nga menor de edad nga residente naman sang Barangay Bailan.
Base sa inisyal nga imbestigasyon sang Pontevedra Municipal Police Station nga nagahampang ang mga biktima sang Lucky 9 sadtong Agosto 11 kaupod ang mga suspek nga sanday Ariel Deita 23-anyos sang Barangay Ambilay, Panitan kag Don Mark Estorque sang Barangay Sinabsaban, Cuartero, Capiz.
Ginapahayag nga samtang nagahampang ang mga ini hinali na lamang nga nag-angkon sang komosyon sa tunga sang biktima kag mga suspek rason nga ginbuno ni Deita ang amo nga menor de edad nga naigo naman sa dughan.
Nahibaluan nga nagtambag pa si Rey matapos nga nakita sini nga ginadumog ang iya pakaisa, gilayon niya ini ginpatindog apang nabun-an man ini ni Don Mark rason nga nag-angkon ini sang pilas sa kilid sang tiyan.
Gilayon naman nga gindala sa ospital ang mga biktima nga padayon naman sa karon nga ginabulong.
Sa karon, yara na sa karsel sang Pontevedra Municipal Police Station si Deita samtang si Don Mark naman ang nagapabilin nga at-large nga madasig nagpalagyo matapos ang insidente.
