Dakop ang 3 tanan ka mga indibidwal matapos ang ginkasa nga drug buybust operation sa gintingub nga pwersa sang Philippine Drug Enforcement Agency (PDEA) kag Philippine National Police (PNP) Regional Intelligence Unit (RIU) sa Mckinley Ilaya, Barangay I, Roxas City.
Ginkilala ang mga nagkaladakpan nga sanday Jolito Berrer, 48-anyos, Michael Sibugan, 44- anyos, lunsay mga residente sang amo nga lugar kag Jother Gonzalez, 26-anyos nga residente naman sang Brgy. Banica, sining syudad.
Sa interview sang Bombo Radyo kay Punong Barangay Odelon Molina sang Brgy. 1, yara sa BADAC watchlist ining si Jolito kag madugay naman ini gina-monitor sang mga ini.
Dugang pa sini, sang una, nagagamit lang kag runner ini si Jolito, sa karon nagaduso na ini.
Mahibaluan nga nakuha sa paghinakop sang mga ini ang 20 tanan ka sachets sang ginapatihan iligal nga droga nga may kabug-aton nga mas ukon menus 30 gramos, may Standard Drug Price nga P204,000.00 kag mga drug paraphernalia.
Magapangatubang naman ang mga nagkaladakpan sa panumbongon nga paglapas sa RA. 9165 ukon Comprehensive Dangerous Drugs Act of 2002.
