ROXAS CITY – Ginkumpirma sang City Disaster Risk Reduction and Management Office nga 78 lamang ka mga Locally Stranded Individuals (LSIs) nga residente sang Roxas City ang kalakip sa nakasakay sa Mercy Voyage kahapon.
Ginpahayag ni Mr.Dennis Saneo CDRRMO Officer nga kasunod sang pag-abot sang mga LSIs ang pagpaidalum sa ila sa rapid test sa diin bangud negatibo ang resulta ginsunod ang 14 day strict home quarantine.
Apang aminado si Saneo nga may isa ka LSI nga temporaryo ginhold sa hortus botanicus matapos naguwa sa profiling nga may history of travel ini sa Japan antes nagtenir sa Metro Manila.
Apang ginpasalig sini nga wala sang kun anuman nga sintomas sang COVID-19 ang wala ginhingadlan nga LSI kag yara sa maayo nga kundisyon.
Nahibaluan nga may mandu si Mayor Ronnie Dadivas sa CDRRMO nga i-accomodate kag buligan ang mga LSI nga residente sang Roxas City nga luyag magpauli sa syudad.
Samtang nagdangat na sa 445 ang numero sang mga LSIs nga nakapauli na sa syudad sang Roxas humalin sang Mayo 15 tobtob subong samtang ang mga OFW repatriates naman nga residente sang Roxas City ang naglab-ot na sa 175.
Nauna na nga ginkumpirma ni Saneo nga may lima ka mga OFWs repatriates nga nag-abot kaina sang aga.
