ROXAS CITY -Padayon ang hot pursuit operation sang kapulisan sa duha ka iban pa nga mga suspek nga nagpangawat sang inugbulang nga manok sa syudad sang Roxas.
Nakahunong na karon sa karsel sang Roxas City PNP si Gerald Ibañez alyas Baldo 20-anyos sang Barangay Cogon, Roxas City matapos nga nadakpan samtang ginapangita pa sanday alyas Tisoy Navarete kag Jun Jun dela Cruz, lunsay residente sang Estancia, Iloilo nga nakapalagyo.
Ginpahayag ni Raffy Ortega, tag-iya sang apat ka inugbulang nga manok nga ginkawat sa Barangay Lonoy, Roxas City nga natigayon nga madakpan si Ibañez matapos natalupangdan sang utod nga si Ryan nga wala na ang hinuptan nga mga manok kag ang higot na lamang ang nabilin.
Samtang naga-estorya ang mag-utod ila nabatian ang nag-andar nga motorsiklo sa highway kag naabtan si Ibañez.
Nagduda ang duha matapos nga wala nagasantu ang sabat sang suspek sa ila mga palamangkutanon rason nga nagtawag sila sang mga tanod nga amo ang nagpangayo sang responde sa mga kapulisan.
Sa pagrekisa sa bayo sang suspek natukiban nga duha ang ginasuksok sini nga jacket magluwas pa sa t-shirt kag sang ginwaswas ang iya nga jacket nagkalahulog ang mga balahibo sang manok.
Nakita man sa lawas ni Ibañez ang madamo nga karus kag bagras sang manok.
Samtang sa pag-usisa sa suspek gintuad sini nga iya ginhaboy ang apat ka mga manok nga ginsulod sa sako sa uyapad sa diin sang ginpadulungan ang uyapad nakita nga patay na ang isa ka manok kag tatlo na lamang ang buhi.
Sang ginpadulungan naman sang kapulisan ang balay sang suspek, may nakita pa nga walo ka mga manok.
