May yara na sang isa nga ginbawian sang kabuhi bangud sa palupok 4 ka adlaw antes ang pagsug-alaw sang New Year.
Suno kay Department of Health (DOH) spokesperson ASec. Albert Domingo, ang biktima nagapang-edaron sang 78-anyos nga lalaki.
Mahibalaun nga ginsindihan sini ang palupok nga Judas belt nga nagresulta sa paglupok sini kabangdnan nga nag-angkon sang multiple injuries.
Ginpadangat pa ang biktima sa ospital sadtong Disyembre 22 apang ginbawian ini sang kabuhi sadtong Disyembre 27.
Dugang pa sang ahensya, may iban pa nga ginasupreher ang amu nga biktima.
Kalakip ang napatay sa inisyal nga 125 nga kaso sang firecracker-related injuries nga na-rekord nagikan sa 62 sentinel sites nga ginabantayan sang DOH sumugod Disyembre 22 tubtob subong Disyembre 28.
Sa nasambit nga numero, 24 diri ang bag-o nga napagkit subong nga adlaw.
Yara sa 102 nga mga biktima, ang nagapang-edaron sang 19-anyos panubo samtang 23 naman ang 20-anyos pasaka kung sa diin 114 diri ang mga kalalakinhan samtang 11 naman ang mga babaye.
Pahayag pa sang DOH, 91 nga kaso ukon 73% bangud sa iligal nga palupok kaangay sang boga, 5-star kag piccolo kung sa diin 75 diri ukon 60% aktibo nga nagagamit sang palupok.
Kaangut sini, ginpaandam ni Domingo nga apisar legal ang palupok delikado sa gihapon ini kag mas maayo nga likawan na lamang nga magamit sini agud mapabilin nga luwas sa pagsaulog sang Bag-ong Tuig.
Nagpaandam man ang ahensya nga magamit lamang sang alternatibo nga pampagahod kaangay sang torotot ukon musika kag pananglitan nga magakinahangla sang bulig, magtawag lamang sa 911 emergency hotline ukon 1555 DOH emergency hotline.
