ROXAS CITY, CAPIZ – Nagapanawagan si 1 Tahanan Party-list Representative Atty. Nathaniel Oducado sa mga kapareho sini nga politiko nga ilugon ang ginhimo sang kapareho nga bag-ohan nga mamalidha nga si Batangas 1st District Representative Leandro Legarda Leviste.
Sa interview sang Bombo Radyo Roxas, ginpahayag ni Oducado nga dapat ipabugal kag himuon nga ehemplo ang desisyon ni Leviste nga balibaran ang ginapahayag ₱360-million nga kickback nga gin-offer sang isa ka district engineer sang Department of Public Works and Highways (DPWH) kaangut sang mga proyekto sa iya nga distrito.
Suno kay Oducado, importante nga mabag-o ang panan-awan sang publiko sa mga kongresista kag mga pulitiko.
Dugang pa sang natungdan, dapat makit-an sang pumuluyo nga indi tanan nga politiko masilaw sa kwarta. Ang ginhimo ni Leviste isa ka pamatuod nga may mga bag-o nga lider nga handa nga bag-ohon ang kalakaran sa pungsod.
Pahayag pa sang mamalidha, kinahanglan nga mangin vigilante man ang publiko sa mga isyu sang korapsyon agud mapasabat ang mga opisyal nga ‘involved’.
Matandaan nga sang damlag lang, sa ika-apat nga State of the Nation Address (SONA), ginpakamalaut ni President Ferdinand Marcos Jr. ang lapnagon nga anomalya sa mga proyekto sang DPWH, partikular na ang mga flood control projects, kag ginsiguro nga pasabton ang mga opisyal kag kontraktor nga ‘involved’ sa mga maanomalya nga kontrata, substandard nga proyekto, kag mangin sa mga ginatawag nga “ghost projects.”
Interviewed by: Bombo Lynd-C Bade
