ROXAS CITY – Ginpabakwit kag ginbawalan nga magbalik sa ila puloy-an ang tatlo tanan ka mga pamilya, matapos nga natiphag ang duta sa kilid sang sapa, sa Ilaya-Ivisan, Ivisan, Capiz, kahapon sang hapon, Hulyo 10.
Narumpag kag gin-anod sang tubig sa suba ang kabug-osan nga balay ni Mr. Sherlito Andrada Mercurio, samtang partially damaged ang puloy-an nanday Mr. Randy Dolor Segurac kag Mr. Jeovani Andrada Amistoso.
Sa pagpakig-angut sang Bombo Radyo kay FO2 Gabriel Emmanuel Dumo-os, information officer sang BFP-Ivisan, ginapahayag nga bangud sa wala untat nga pag-ulan kahapon nga adlaw, naghumok ang pundasyon sang mga balay, ilabi na sang pamilya Mercurio nga naubos dala sang natiphag nga duta.
Ginabulubanta nga may kahalitan nga P50K ang naanod nga balay, samtang ginahibalo pa ang iya sang partially damaged nga puloy-an.
Wala man sang napilasan sa insidente, bangud wala sang tawo ang balay nga naubos hulog.
Padayon man ang paalinton sang mga otoridad sa iban pa nga lugar nga yara sa kilid sang kasubaan ang ila puloy-an.
