10 estudyante pilason matapos nagbunggo sa poste ang ginasakyan nga tricycle

ROXAS CITY – Pilason ang napulo ka mga estudyante matapos nagbunggo ang ila ginasakyan nga tricycle sa isa ka poste sa Barangay Linateran, Panay, Capiz.

Sa nakuha nga impormasyon sang Bombo Radyo gikan sa Panay Municipal Police Station, gikan ang mga biktima sa balay sang ila nga classmate kag pabalik na kuntani sa ila nga eskwelahan.

Apang pag-abot sa nasambit nga lugar, ginapahayag nga naghalog ang pag-angut sang motorsiklo sa side-car sini.

Bangud diri, nagbalang-balang ang tricycle kag nagbunggo sa isa ka poste.

Nag-angkon sang mga pilas sa lawas ang mga sakay nga estudyante nga gilayon gindapatan sang pagbulong sang Capiz Emergency Response Team antes gindala sa ospital.