Ginabantayan subong sang Office of the Civil Defense (OCD) ang napulo ka aktibo nga fault lines sa Negros Island Region kasunod sang halit sang magnitude 7.8 nga linog nga nagluntad sa baybayon sang Maasim, Sarangani sang Hunyo 8.
Lakip sa mga ginabantayan nga aktibo nga fault lines amo ang Southern Negros Fault, Manjuyod-Pamplona Fault, Bindoy-Guihulngan Fault, Pinocawan River Fault, San Carlos Fault, Calatrava-Toboso Fault, Sibulan Fault, Central Negros Fault, Candoni Fault kag West Negros Fault.
Suno sa mga otoridad, ang mga ini nga fault lines may kapasidad nga makapaguwa sang linog nga mahimo mag-abot sa magnitude 6.9.
Ginabantayan man ang posible nga lihok sang Negros Trench nga isa man sa mga geologic structures nga mahimo makaapekto sa rehiyon.
Bilang kabahin sang pagpangandam sa posible nga mga kalamidad, nagpatigayon na sang mga earthquake simulation kag disaster preparedness activities ang Provincial Disaster Risk Reduction and Management Office sa mga eskwelahan kag komunidad.
Sa pihak nga bahin, ginpahayag na sang PHIVOLCS nga ang magnitude 7.8 nga linog sa Sarangani resulta sang Cotabato Trench.
Suno sa ahensya, ang lokasyon sang linog, focal mechanism sini kag pattern sang mga aftershocks nagapakita nga ini resulta sang subduction ukon ang paglusot sang isa ka tectonic plate sa idalom sang isa pa sa kalaparon sang Cotabato Trench, kag isa ka daku nga estruktura sa kadagatan malapit sa Mindanao.
