ROXAS CITY – Nagalab-ot sa 10 ka mga balay ang gintupok sang kalayo sa Philippine Railway Street, Barangay 9, Roxas City.
Ba-se sa datos sang City Social Welfare and Development Office (CSWDO), kapin sa 24 ka pamilya ang nadulaan sang balay.
Sa interview sang Bombo Radyo kay Deputy Fire Marshall kag Chief Investigator Senior Fire Officer 2 Marlon Garbo, nagsugod ang kalayo sa ginlutuan sang pila ka mga boarders sa ila nga boarding house nga madasig nga naglapta sa kaiping nga mga balay.
Wala sang gamit nga nasalbar ang mga biktima nga temporaryo nga nagpaligad sang gab-i sa Barangay Hall.
Mahibaluan nga kalakip sa nasunugan sang balay ang mismo kapitan nga si Punong Barangay Eufrosimo Azarcon.
Sa karon, padayon pa nga ginahibalo sang Bureau of Fire Protection (BFP) kung ano ang gintunaan sang sunog kag pila ang kabug-usan nga danyos sini.
