Indi magnubo sa 10 ang patay kag 50 ang pilason sa Israeli airstrike sa Lebanon’s Bekaa Valley.
Suno sa militar sang Israel, una nga ginpuntariya sini ang mga pasilidad sang Hezbollah sa lugar sang Baalbek.
Ang mga pag-atake ang isa sa pinakamakamamatay nga mga insidente sa Lebanon sang nagligad nga mga semana. Makapila ka beses nga gina-akusahan sang magtimbang nga bahin ang isa kag isa nga nagalapas sa kasugtanan.
Dugang pa sang Israeli military, naigo sini ang command center sang Hezbollah sa Baalbek, bahin sang Bekaa Valley. Lakip sa mga napatay ang isa ka mataas nga opisyal sang Hezbollah, apisar nga gina-verify pa ang iya identity.
Matandaan, ang Israel kag Hezbollah nag-ugyon sa isa ka ceasefire nga ginpangunahan sang Estados Unidos sang 2024 agud tapuson ang kapin sa isa ka tuig nga pag-inaway sa border, nga nagtuga sang mga pag-atake sang Israel nga nagpaluya sa grupo nga suportado sang Iran. Sugod sadto, ang duha ka bahin nag-akusar sa isa kag isa nga naglapas sa kasugtanan.
Ginkondenar sang Hamas ang pag-atake kag ginpanginwala ang pag-angkon sang Israel nga isa ini ka pasilidad sang ila grupo. Suno sa Hamas, ang naigo amo ang isa ka pasilidad sang Joint Security Force.
Nahibaluan nga sang biyernes, ginkumpirma sang Ministry of Public Health sang Lebanon nga duha ka indibidwal ang napatay sa pag-atake sang Israel sa kampo sang Ein el-Hilweh, ang pinakadaku nga kampo sang mga refugee sang Palestinian sa nasambit nga pungsod.
