ROXAS CITY – Nangin kabahin bilang benepisyaryo sang Risk Resiliency Program-Climate Change Adaptation and Mitigation-Disaster Risk Reduction (RRP-CCAM-DRR) nga programa sang Department of Social Welfare and Development (DSWD) ang 10 tanan ka mga kabanwahanan sa probinsya nga ginhiwat sang damlag lang.
Sa interview sang Bombo Radyo kay Atty. Sheila Artillero PDRRMO OIC Head ginpahayag sini nga nagsugod ang amu nga programa sadtong Hunyo 15 subong nga tuig kung sa diin naglab-ot sa kapin 3,627 ka mga indibidwal ang nangin kabahin kag natudluan sang ihibalo pag-abot sa emerhensya.
Suno kay Artillero, tinutuyo sini agud matudluan ang mga pumuluyo kung anu ang nagakadapat himuon sa tion nga may yara sang mga wala ginalauman nga hitabo sa ila barangay.
Nagdugay ang amu nga programa sang 10 ka adlaw kung sa diin nagbaton ang mga benepisyaryo sang cash payment.
Sa sulod sang nasambit nga inadlaw, 4 diyas diri ang ginpatigayon para sa Cash for Work kun sa diin nagpatigayon sang Tree Planting Activity kag pagpangtinlo samtang 6 diyas naman nga ginpaidalom sila sa Community Based Disaster Risk Reduction and Management Training sa pagpanguna sang Capiz Provincial Disaster Risk Reduction Management Office (PDRRMO) kaupod ang Philippine Coast Guard-Capiz.
Pinaagi man sa programa sang DSWD, ginhanas ang mga ini angut sa Standard First Aid and Life Support Skills and Basic Water Survival concepts nga mahimo nila pagagamiton sa ila pagpangabuhi ilabi na sa tion nga may yara sang kalamidad.
Panugyan ni Artillero sa pumuluyo, pananglitan nga may yara sang kasubong sini nga mga aktibidad nga ginatan-ay ang gobyerno indi magkahangawa nga magpakigbahin bangud daku ini nga bulig indi lamang sa kaugalingon kundi subong man sa kadam-an.
