ROXAS CITY – Yara na karon sa Puluy-an sang Pagpalangga Crisis Center sang City Social Welfare and Development Office ang 10 ka tuig nga bata nga lalaki ginapahayag nagsumbag sa napatay nga 12 anyos nga dalagita sa Barangay Libas, Roxas City.
Ang napatay nga biktima ang ginkilala nga si alyas Ella nga residente man sang amo nga lugar.
Mahibaluan nga base sa nakuha nga impormasyon sang Bombo Radyo, nagpaligo kag naghampang sang lumsanay ang mga ini sang ginapahayag nga napikon ang bata nga lalaki rason nga ginapahayag nga ginsumbag sini sa sulok sulok ang biktima.
Apang nagaguwa sa resulta sang autopsy nga nalampos ang ulo sang biktima nga ginalantaw rason sang iya kamatayon.
Nahibaluan nga gintapungol man sang bata nga lalaki ang biktima kag natumba ini nga ginapatihan nagbunggo ang ulo sa matig-a nga bagay.
Magluwas diri ginapahayag pa nga may yara sang balatian sa korason ang biktima.
Diri kag nadulaan sang pangalibutan ang biktima rason nga gindala sa ospital apang ginbawian man sang kabuhi.
