ROXAS CITY – Dead on Arrival ang isa ka 10 katuig nga bata matapos nga ginaalegar natiphagan sang buli/buri (Palm Tree) ang ila balay sa Barangay Pangpang Norte, Mambusao, Capiz.
Base sa inisyal nga imbestigasyon sang Mambusao Municipal Police Station nga samtang nagakatulog ang wala na ginhingadlan nga Grade 4 pupil sa sulod sang ila nga balay hinali na lamang nga natumba ang puno sang buli/buri rason nga naigo ang iya ulo sang balayan sang ila atop nga gintunaan sang iya nga kamatayon.
Nagataas naman sang 20 metros ang nasambit nga puno rason nga nabudlayan pa ang mga residente nga kuhaon ini kun sa diin gin-utod ini gamit ang chainsaw.
Nagaplano naman kuntani ang lolo sang biktima nga amo man ang punong barangay sa ila lugar nga utdon ang nasambit nga puno apang busy man ini sa pagpanerbisyo sa ila nga barangay.
Gindala pa ang biktima sa ospital apang gindeklarar naman ini nga dead on arrival sang attending physician kag yara na karon ang bangkay sini sa isa ka punerarya.
Mahibaluan nga wasak gid ang balay nga gintumbahan sang amo nga puno.
