ROXAS CITY – Napulo sa 12 ka mga repatriated Overseas Filipino Workers (OFW’s) sa Capiz ang natigayon na nga mapaidalom sa real-time polymerase chain reaction (RT-PCR) test.
Ini ang ginkompirmar sang tagpamaba sang Capiz Provincial Health Office (PHO) nga si Mr. Ayr Altavas sang mainterview sang Bombo Radyo.
Suno kay Altavas nga sa 12 ka nasambit nga OFW’s, 6 diri ang taga-Roxas City; 2 sa Mambusao; kag tag-1 sa Jamindan, Panitan, Maayon kag President Roxas kun sa diin nagapadayon sa karon ang ila nga quarantine period sa mga isolation facility nga gindesignar sang ila tagsa ka mga local government units (LGU’s).
Suno diri nga 10 sa ila ang nakuhaan na sang sample specimen kag ginpadala sa Western Visayas Medical Center para sa PCR testing samtang ang 2 nga nabilin ang naka-schedule sa Mayo 4, Lunes nga adlaw.
Ginpaathag sang opisyal ang importansiya sang community isolation sang mga nagaabot sa Capiz gikan sa mga lugar nga tuman nga apektado sang coronavirus disease (COVID-19).
Suno diri nga kinahanglan anay sila nga i-likaw sa ila pamilya kag sa komunidad tubtob sa indi masiguro nga hilway sila sa amo nga balatian agud malikawan ang paglapta sang nasambit nga virus.
Samtang ginpahayag sini nga sa 107 ka mga suspected cases sa Capiz, 81 na diri ang naka-recover, 12 ang yara pa sa ospital, 1 ang naka-community quarantine kag 1 ang padayon man ang isolation.
Ginklaro man sini nga sa 12 ka mga nagkalamatay nga suspected cases, 1 lamang diri ang nag-positibo kag 11 ang negatibo sa nasambit nga balatian.
Sa 157 naman ka mga High Risk Contacts (HRC’s), 156 na sa mga ini ang nag-negatibo sa COVID-19 kag 1 ang padayon pa nga naka-community isolation.
