Ginbuyagyag sang Republic of Korea Military Police nga yara sa 100 ka suldado sang North Korea ang napatay sa giyera sa tunga sang Ukraine kag Russia sumugod sang nag-upod ang mga ini sa bahin sang Russia sa una nga quarter sang Disyembre.
Ini ang base sa impormasyon nga ginpalab-ot sang National Intelligence Service sa parliament kun sa diin yara sa 1,000 ka iban pa nga North Koreans ang napilasan sa giyera.
Suno sa Military Police officer nga si Lee Sung-kwon, kalakip sa mga napatay amu ang high-ranking officials kag mahimo nga indi pamilyar ang mga ini sa terrain kag drone warfare.
Una naman nga ginpahayag sang tagpamaba sang US Pentagon sadtong Lunes nga napatay ang mga suldado nga North Koreans nga wala naghatag sang insakto nga numero kag makaligad ang isa ka adlaw, ginkumpirmar sang isa ka US official nga may pila ka gatos nga North Koreans ang napatay ukon napilasan sa giyera.
Ginapatihan nga napatay ang mga ini sa Kursk region sang Russia kun sa diin nasakop sang Ukraine ang gamay nga teritoryo didto matapos ang ila sorpresa nga pagsalakay sadtong Agosto.
Matandaan una na nga na-report sadtong Oktubre sini nga tuig nga nagpadala ang NoKor sang 10,000 nga tropa sini para buligan ang Russia sa giyera batuk sa Ukraine.
