Samtang nagahilapit ang Valentine’s Day, iban sa inyo nagaka-pressure na agud makapangita sang “the one.”
Gani nagpaandam ang otoridad nga mangin mahinalungon sa pagpangita sang “the one” bangud posible nga mangin biktima ikaw sang “Love Scam” nga magluwas makapasakit ang imo balatyagon, makapasakit man sang imo nga bulsa.
Gin-identify sang Cybercrime Investigation and Coordinating Center (CICC) ang anum ka mga common types sang love scammers.
𝑺𝒂𝒅 𝒃𝒐𝒚, 𝒔𝒂𝒅 𝒈𝒊𝒓𝒍
Ini nga scammers ang nagapaluoy-luoy ukon naga-share sang ila masubo nga istorya agud makakuha sang simpatiya kag amat-amat nga nagapangayo sang kwarta.
𝑺𝒆𝒅𝒖𝒄𝒆𝒓
Ini sila amo ang nagagamit sang “too good to be true” profile photos, masami halin sa kinawatan nga pictures agud makapanunto kag amat-amat nagapangayo sang mga intimate photos, nga sa ulihe gamiton agud mang-blackmail.
𝑰𝒏𝒗𝒆𝒔𝒕𝒐𝒓
Ini nga scammers ang nagakuha sang buot sang mga biktima agud ma-engganyo nga mag-invest ukon magsulod sa cryptocurrency schemes. Masami nagapakuno-kuno bilang attractive foreigners nga ginabida ang ila mga photos kag enggrande nga lifestyle.
𝑻𝒉𝒆 𝒔𝒆𝒓𝒗𝒊𝒄𝒆𝒎𝒆𝒏
Ini nga scammers amo ang nagapakuno-kuno bilang foreign military ukon uniformed personnel, kag nagapangita “KUNO” sang lifelong partner sa diin target sini ang mga middle-aged women. Ang ila nga goal, amo ang makakwarta.
𝑬𝒔𝒄𝒐𝒓𝒕
Ini nga scammers ang nagahingyo sang bayad antes ang pagpakigkita sa personal kag masami naga-send sang nude photos agud ma-engganyo ang biktima.
𝑺𝒍𝒐𝒘 𝒃𝒖𝒓𝒏
Ini nga scammers ang amat-amat nga nagakuha sang salig sang biktima, nagapakuno-kuno nga genuine partner apang masami nagapangita sang rason agud indi magkitaay. Apang sa tion nga magpangayo ini sang kwarta kag ginhatagan, gilayon ini sila nga madula.
Pahayag sang CICC, masami nga target sang love scammers amo ang mga tawo nga nagapangita sang foreign partners, may estable nga trabaho, mga nagadali nga mag-settle, solo parents kag iban pa nga vulnerable individuals.
Nagpaandam man ang otoridad nga ang love scams ang nangin sophisticated na gid bangud mas mahapos na sa mga scammers ang maggamit sang artificial intelligence agud maka-generate sang fake photos kag identities.
Sa data sang CICC, nagapakita nga masobra 1,000 Filipinos ang nahulog nga biktima sang love scams sang nagligad nga tuig, sa diin ang Metro Manila ang naka-rekord sang pinakamataas nga kaso nga may 36.
As of January 2026, may yara na sang 15 ka mga kaso sang love scams nga na-rekord.
“January because it’s the season leading up to Valentine’s; June because of the ‘June Bride’—those traditional Filipino beliefs,” pahayag ni CICC Executive Director Aboy Paraiso.
Mahimo nga mag-report ang biktima sang love scam sa CICC hotline 1326, magtawag ukon mag-text sa 0991-481-4225, 0947-714-7105, ukon 0966-976-5971.
Dugang pa sang CICC, maka-trace sila sang mga rehistrado nga phone numbers sang suspek kag maka-request sang pag-block sang ila mga social media accounts.
