ROXAS CITY -Natalana nga magabaton sang kantidad nga nagalab-ot sa 100mil pesos ang diese sais ka mga kabanwahan kag syudad sang Roxas gikan sa gobyerno probinsiyal.
Ini ang ginkumpirmar ni League of the Municipalites of the Philippines Capiz-Chapter President kag Mambusao Mayor Leodegario Labao Jr sa interview sang Bombo Radyo.
Suno kay Mayor Labao nga preparado na ang tseke nga igahatag sa mga kabanwahanan kag Roxas City agud igabulig sa mga frontline workers nga nagaserbisyo para mapasiguro nga mangin hilway ang probinsiya sa paglapta sang Coronavirus disease 2019.
Sa kabug-usan, nagalab-ot sa uno punto siete milyones pesos ang igapagguwa nga pundo sang gobyerno probinsiyal gikan sa annual budget sang probinsiya.
Base sa memorandum order no. 46 series of 2020, ginmanduan ni Capiz Governor Esteban Evan Contreras si provincial budget officer Antonio Arbis nga patigayunon ang pagproseso sang pundo para gilayon ini nga mahatag sa natungdan nga mga local government units.
Ang nasambit nga pundo ang sarang maggamit sa pagpamakal sang mga kinahanglanon nga supply ukon protective equipment sang mga frontliners nga nagaserbisyo sa syudad kag kabanwahanan.
