Isa ka 11-anyos nga babaye ang milagro nga nakaluwas matapos nga ma-stranded sang tatlo ka adlaw sa isa ka shipwreck sa kalalawran nga sakop sang Lampedusa islands sa pungsod Italy.
Base sa nangin panaysayon sang dalagita, nagsakay sila sang iya nga pamilya sa isa ka barko gikan sa Sfax City sa pungsod sang Tunisia. Kaupod suno diri nila ang tubtob 45 ka tawo.
Sang malapit na sa isla sang Lampedusa, dalayon nga naubon ang ila ginasakyan nga barko bangud sa isa ka mabaskog nga bagyo.
Sa karon wala sa gihapon nakapaguwa sang bug-os nga detalye ang survivor kasunod sang pagkaluwas sini halin sa nagbaliskad nga barko.
Samtang, sa nangin panaysayon sang German-based charitable organization nga Compass Collective, naagyan nila ang dalagita sa kalalawron nga sakop sang nasambit nga isla, kaagahon sang Miyerkules, Disyembre 11.
Ang amu nga organisasyon ang nakasakay sa isa ka bangka padulong sa isa ka rescue operation sang maswerte nga makita nila ang survivor.
Sakay ang dalagita sa isa la improvised life ring nga himo sa inner tube sang mga kariton. Suksok man sini ang gintahi-tahi nga life jacket.
Suno sa mga rescuers, ginsaysay sang dalagita nga pila na ka adlaw ini nga wala makakaon kag makaino.
Nakitaan man ang amu nga dalagita sang hypothermia, apang nagapabilin nga ‘responsive’ sang ini ang gin-istorya.
Sa karon, yara na sa pag-atipan sang Italian Red Cross ang dalagita samtang padayon nga nagapaayo halin sa tatlo ka adlaw nga pag-utaw-utaw sa kalalawran.
