Naglab-ot na sa 11 ka mga botika sa probinsya sang Capiz ang nag-apply sang accreditation sa idalom sang Guaranteed Accessible Medications for Outpatient Treatment o GAMOT Program nga kabahin sang YAKAP program man sang PhilHealth.
Sa interview sang Bombo Radyo kay Mary Jane Amigo, Social Insurance Officer 3 kag Public Information Officer sang PhilHealth Capiz, iya ginpahayag, nga sa idalum sang programa nagahatag ini sang libre nga serbisyo sa ikaayong lawas kag benepisyo sa ospital.
Suno kay amigo, Indi kinahanglan nga magmasakit anay antes maka-avail kundi tanan nga Pilipino pwede gid basta may PhilHealth number.
Dugang pa niya nga bukas ini para sa PWD, senior citizens, kag iban pa nga miyembro sang PhilHealth.
Sa idalom sang GAMOT Program, ang kada Pilipino pwede makabaton sang libre nga bulong nga naga-labot sa ₱20,000 kada tuig para sa outpatient treatment, base sa reseta sang YAKAP doctor.
Padayon ang panawagan sang PhilHealth nga gamiton ang YAKAP kag GAMOT Program para sa libre kag husto nga serbisyong sa ika-ayong lawas.
