ROXAS CITY – Nagalab-ot sa halos 11 ka mga estudyante sang Ivisan National High School sa banwa sang Ivisan, Capiz ang ginaalegar gin-possess sang malain nga espiritu.
Sa interview sang Bombo Radyo Roxas kay Mary Ann Dominggo, isa sa mga manunudlo sang nasambit nga buluthuan, ginpahayag sini nga gilayon ginmandu sang alkalde sang banwa nga si Ivisan Mayor Jose Noel Yap ang pagsuspinde sang klase sa eskwelahan kasunod sang nasambit nga insidente.
Mahibaluan nga una nga na-possess ang pila ka mga Grade 9 students tubtob sa nagdamo ini kag nadugangan pa sang pila ka mga Grades 11 kag 12 students nga lunsay mga kababainhan.
Una nga naglain ang pamatyag sang mga ini antes nalipong kag ginsundan sang ila nga pagpalaniskog nga halos indi magpapugong.
Indi man halos mahangpan ang mga tinaga nga naggaguha sa ila nga bibig rason nga ginpakamaayo na lamang sang pamunuan sang eskwelahan nga dal-on ang mga ini sa ospital.
Suno naman kay Glendy Dela Cruz, isa ka grade 11 student, nga humalin sang nagsaylo sang classroom ang mga grade 9 students sa ginbakantehan nga hulot sang mga senior high school students, masami na nga nagalain ang pamatyag sang mga estudyante.
Nahibaluan pa nga may pila ka mga kahoy nga ginpasarahe malapit sa nasambit nga hulot rason nga ginaalegar nga may malain nga tinuga nga natandog sa nasambit nga lugar.
