PANAY, CAPIZ – Dakop sa akto ang onse (11) tanan ka mga tripulante nga nagapatigayon sang iligal nga pagpangisda ukon TRAWL, sa kalalawran sa banwa sang Panay.
Sa nakuha nga impormasyon sang Bombo Radyo nagikan sa Panay PNP, ginapahayag ang ang nasambit nga mga tripulante ang ginapangunahan sang ila nga kapitan sa sakayan ang ginkilala kay alyas “Mabini”, 36-anyos kag ang napulo nga crew members sini ang lunsay mga residente sang Brgy. Calumpang, Estancia, Iloilo.
Nakuha sa paghinakop sa mga nagkaladakpan ang isa ka unit sang pump boat nga nagabalor P350,000, isa ka unit sang makina nga nagabalor P150,000, fishing net with complete accessories nga nagabalor P200,000 kag nakuha man ang ginabulubanta nga 200 kilos nga nanari-sari nga sahi sang isda nga nagabalor sang P50,000.
Sa karon, yara na ang mga nagkaladakpan sa paghinakop sang MENRO-LGU Panay para sa nagakaigo nga disposisyon.
