ROXAS CITY – Pilason ang 11 ka mga indibidwal sa bungguanay sang salakyan kag tricycle sa Barangay Switch, Tapaz, Capiz.
Nag-angkon sang mga pilas sa lawas ang siyam ka pasahero sang tricycle, driver sini kag ang driver sang nakabunggo nga salakyan.
Ginkilala ang driver sang tricycle nga si Angelito Palomar, 45 anyos sang Barangay Taft, Tapaz, kag ang mga pasahero sini nga sanday Darlyn Pulmones, 20 anyos, Medilyn Pulmones, 15 anyos, Araceli Gicole, 65 anyos, Leticia Ganit, 52 anyos, Emelsa Del Amor, 28 anyos, Trisha Mae Del Amor, 7 ka tuig, Sarah Joy Del Amor, 8 ka tuig, Mema Palmonte, 63 anyos kag Fermalita Gimeno, 64 anyos.
Ginkilala naman ang driver sang salakyan nga si Angelo Ubalubao, 29 anyos, isa ka pari kag residente sang Kilometer 2, Barangay Lawaan, Roxas City.
Sa inisyal nga imbestigasyon sang Tapaz Municipal Police Station, padulong kuntani sa town proper ang tricycle sang naglapaw ini sa linya rason nga nabungguan sang salakyan nga ginamaneho ni Ubalubao.
Gilayon nga gindala sa ospital ang napilasan nga mga pasahero kag ang duha ka mga driver agud madapatan sang nagakaigo nga pagbulong.
